O PSOE de Betanzos impulsa a renovación dos parques infantís da Ribeira e Pintor Seijo Rubio cun investimento de máis de 200.000 euros
O goberno municipal de Betanzos, liderado por María Barral, continúa a avanzar na mellora dos espazos públicos destinados á infancia, coa licitación das obras de renovación dos parques infantís da Ribeira e Pintor Seijo Rubio. Estas actuacións, que supoñen un investimento superior aos 200.000 euros, forman parte dun ambicioso programa de modernización de parques que inclúe tamén intervencións en Alfonso IX, o Pasatempo, As Doas, Viuxe e, anteriormente, na Praza do Emigrante, Carregal, o centro histórico e o Xuncaliño.
Desde o PSOE de Betanzos destacamos que esta iniciativa responde ao compromiso do goberno local por ofrecer espazos seguros, inclusivos e sustentables para o xogo e o desenvolvemento dos nenos e nenas da cidade. Os traballos contemplan a retirada dos xogos existentes, a instalación de novo pavimento continuo de caucho e a incorporación de elementos lúdicos adaptados ás diferentes idades e capacidades.
No parque da Ribeira instalaranse xogos con temática mariñeira —unha balea, un faro, unha medusa, un barco pirata e un balancín múltiple— que permitirán crear un espazo de xogo atractivo e estimulante. Ademais, repararase o valado perimetral e instalarase novo mobiliario urbano, como bancos de plástico reciclado e papeleiras antivandálicas.
Pola súa banda, o parque de Pintor Seijo Rubio será transformado nun espazo inclusivo, pensado para que todos os nenos e nenas, tamén aqueles con diversidade funcional, poidan xogar, interactuar e aprender en igualdade. Entre os elementos previstos destacan xogos adaptados, pavimento absorbente de impactos e mobiliario urbano ecolóxico. A nova área de xogo estará deseñada para idades comprendidas entre os 0 e os 15 anos, con estruturas homologadas para persoas con mobilidade reducida, xogos de escalada, paneis táctiles, túneles e elementos integradores.
O PSOE de Betanzos reafirma así a súa aposta por unha cidade máis amable, accesible e comprometida co medio ambiente. A elección de materiais reciclados e reciclables para o mobiliario urbano reflicte a vontade de avanzar cara a un modelo de urbanismo sostible, que poña no centro ás persoas e ao futuro da cidade.
Seguiremos traballando para que Betanzos sexa un referente en calidade de vida, inclusión e coidado dos espazos públicos.
