O PSOE de Betanzos impulsa a construción dunha pista cuberta de pádel no Carregal grazas ao POS+ da Deputación
O goberno municipal de Betanzos, liderado por María Barral, continúa apostando polo reforzo das infraestruturas deportivas da cidade. Aproveitando a segunda fase do Plan POS+ Adicional da Deputación da Coruña, o executivo local levará a cabo a construción dunha pista cuberta de pádel na zona do Carregal, respondendo así a unha demanda reiterada por parte da veciñanza.
Esta nova instalación, que contará cun investimento superior aos 150.000 euros, situarase nunha parcela próxima á piscina exterior do complexo deportivo, sen afectar as edificacións existentes. O proxecto será presentado hoxe nun pleno extraordinario antes de ser remitido á Deputación para a súa aprobación definitiva.
Desde o PSOE de Betanzos destacamos que esta actuación forma parte dun plan integral de mellora das dotacións deportivas, que se irá desenvolvendo en función dos programas de axudas das distintas administracións. A pista de pádel, de uso exclusivamente deportivo, contará cun acceso independente, valado perimetral e compartirá os vestiarios da piscina, que se atopan en óptimas condicións.
O deseño técnico cumpre cos requisitos establecidos polo Consello Superior de Deportes e a Federación Española de Pádel, incorporando iluminación artificial e sistema de recollida de augas pluviais conectado á rede municipal.
Ademais, o goberno local socialista mantén o seu compromiso coa ampliación da oferta deportiva en Betanzos. Hai uns meses, nun encontro co secretario xeral para o Deporte da Xunta, José Ramón Lete, presentáronse propostas para a construción dun novo pavillón, un skaterpark e un pump track, co obxectivo de seguir avanzando cara a un modelo de cidade máis activa, inclusiva e saudable.
Desde o PSOE de Betanzos reafirmamos o noso compromiso coa mellora da calidade de vida da cidadanía a través do deporte, a participación e o investimento público responsable.
