Barral destaca a repercusión de Betanzos no verán galego e sitúa en máis de 24 millóns de euros o impacto económico que se xera na cidade
A alcaldesa de Betanzos fixo hoxe balance dun verán que cualifica como “extraordinario” tanto pola participación cidadá como polo impacto económico xerado. María Barral, subliñou que “vivimos uns meses intensos, nos que a implicación de veciños, veciñas e visitantes foi excepcional”, consolidando a cidade como un dos grandes referentes do verán en Galicia.
Eventos emblemáticos como a Feira Medieval, que reuniu arredor de 150.000 persoas, ou o Día do Globo, con máis de 50.000 asistentes, sumáronse a unha programación cultural e festiva diversa e de calidade: actuacións musicais con Panorama, Olympus, París de Noia, o concerto de Budiño ou o tributo a ABBA; as xiras a Os Caneiros; o ciclo Mariñas Sound; o festival do Pasatempo; a Semana do Cinema; e os programas de música e teatro na rúa. Todo isto, unido ao atractivo patrimonial e turístico de Betanzos, fixo que este verán fose, en palabras da alcaldesa, “dos mellores dos últimos anos”.
Os datos da Oficina de Turismo, así como os indicadores trasladados pola hostalería e o comercio local, confirman unha afluencia constante de visitantes desde xuño. Este movemento traduciuse nun impacto económico estimado en 24 millóns de euros, unha cifra moi relevante para unha cidade como Betanzos. “Non só falamos de números: falamos de emprego, de dinamización comercial, de reservas en hoteis e aloxamentos, de actividade no transporte e nos servizos asociados. En definitiva, riqueza que queda na nosa cidade e fortalece o noso tecido económico”, sinalou Barral.
Desde o PSOE de Betanzos reivindicamos que apostar pola cultura, polas tradicións e pola organización de eventos é investir no presente e no futuro da cidade. Cada euro mobilizado xera oportunidades, e cada visitante que nos descobre convértese nun embaixador de Betanzos.
A alcaldesa quixo agradecer a implicación de todos os sectores, comerciantes e hostaleiros polo seu esforzo, das asociacións e colectivos pola súa colaboración, e especialmente da veciñanza e dos milleiros de visitantes que fixeron de Betanzos o seu destino este verán. “Seguiremos traballando nesta liña para que estas cifras sigan crecendo de maneira sostible”, concluíu.